Hello : Blog : The Lizard  ///  Previous   Next
 
Top 10 rrenat më efektive shqipe
By The Lizard in Kosova on 01/10/2012 with comments
Tags: Albanian, Case Study, Comedy, Creative, Culture, Inspiration, Language, Politics, Social, Top 10, Tutorial, Writing
 
Na zhapinat jemi krijesa që duhemi me u adaptue me rrethin ku jetojmë, përndryshe ngordhim: ose vdesim urie, ose na kap ndonjë shpezë grabitqare, në këtë rast ndonjë shqiponjë.

Zhapin Berisha | 02 tetor 2012
 
Meqenëse jetoj në treva të shqyponjave, gjatë jetës sime kam qenë i detyruem me iu përshtatë rrethit në mënyra të ndryshme, nji prej të cilave janë rrenat, që çdo ditë ia lëshojmë njani-tjetrit, prindërve, arsimtarëve, klientëve, të dashurve e shpeshherë edhe vetvetes.

Ma poshtë janë top 10 rrenat ma efektive të cilat secili prej juve, lexues të dashur, së paku nji herë në jetë i keni përdorë, bashkë me udhëzimet se qysh me i përdorë edhe ma mirë.

10. U kry
Përdoret zakonisht kur je për ngutë, ose do me u tregue i sigurt, i vendosun edhe burrënor, në një ambient në prani të shefit edhe kolegëve, ose të një grupi femrash. Ky gjest tregon vendosmërinë të cilën nuk e ke, edhe është e garantueme se ke me harrue premtimin hala pa dalë mirë prej dhomës. Nuk përdoret për gjana që vërtet i ke krye, por për gjana që "ke me i krye" në një të ardhme jo shumë të largët, zakonisht 3-4 ditë.

Kur të konfrontojnë se pse nuk e ke krye punën as mbas disa ditësh (a muajsh, a javësh), përdore njanën prej rrenave 7, 6, 5, 3 ose 1.

Shembull efektiv përdorimi:
Bac, u kry!
 


9. S'ka problem
Përdoret zakonisht nga persona që kanë dëshirë me u tregue profesionistë apo me autoritet, por që në fakt dojnë veç me të heqë qafe. Të garantueme e ke që problemet e panumërta kanë me dalë në ditët në vijim.

Shembull efektiv përdorimi:
S'ka problem, bileta e juaj e aeroplanit dhe pushimi all inclusive u konfirmua.
 


8. Di me e ba
Përdoret në momente kur njerëzit rreth teje janë duke u mahnitë me ndonji teknologji të sofistikueme apo fenomen të paspjegueshëm, edhe ti je i sigurt që asnji prej tyne nuk e ka idenë se si funksionon ai objekt apo ajo dukuni. Zakonisht ka të bëjë me raketa, aeroplana e robota, ose me montazha në Photoshop edhe efektet speciale të filmave.

Shembull efektiv përdorimi:
Eh, kur kam ba unë kësi...
 


7. Mu ka prishë kompjuteri/thye passwordi
E krijueme enkas për çështje që kanë të bajnë me Teknologji Informative (IT), prej moskthimit të nji emaili (apo dërgimit të një emaili gabimisht), deri te moskryerja e ndonjë pune që bëhet vetëm me kompjuter, zakonisht programim e dizajn, por edhe kontabilizëm, arkitekturë, video montazhë, e të ngjashme.

Shembull efektiv përdorimi:
Iu kanë korruptu sektorat e BIOS-it.
Ose çkado tjetër të pakuptueshme, si Pauer supllaji e kish lëshue / S'mujsha me ia ba ristor se s'pat bekap / Iu djeg rami prej tensionit, e të ngjashme.
 


6. M'duel nji punë
Për ata që dëshirojnë me u ndje shefa, menaxhera ose pjesë ekzekutive e kompanisë apo familjes, kjo frazë përdoret për mos me i dhanë llogari personave me rang më të ulët në hierarki, konkretisht punëtorit ose fëmijës. Ata burra që kujtojnë se edhe grueja apo dashnorja janë më të ulëta në hierarki, munden me përjetue pasoja të tmerrshme nëse e përdorin këtë frazë në to. Pregatituni me e spjegue punën në fjalë hollësisht, nëse e përdorni në gjysmën tuej ma të bukur.

Shembull efektiv përdorimi:
E kam nji punë me njanin në nji ven' për nji sen'.
 


5. Telefonin në "silent"/alarmi ish ndalë
Vonesat në shkollë, punë ose në veprimtari sociale zakonisht përcillen me këtë shprehje. Duke qenë se gjithkujt i ndodh edhe është gati e pamundun me e verifikue, kjo zakonisht pranohet me një fryemje hundësh edhe shikim të me bisht të synit.

Shembull efektiv përdorimi:
Isha në takim të randësishëm / varrim / mbledhje të prindërve / orë mësimi, edhe kisha harrue që e kam lanë në silent.
 


4. Jam helmue/me grip
Mungesat në shkollë, punë ose në veprimtari sociale zakonisht përcillen me këtë shprehje. Duke qenë se është shumë fleksibile nëse e merr parasysh papritshmërinë e helmimit edhe gripit, kjo shquhet për spontanitetin e saj edhe lehtësinë me u thanë.

Shembull efektiv përdorimi:
S'di as vetë pse e hangra atë byrek aty / pse vozita me xhama të hapun.
 


3. Kam mysafirë/mjeshtër
Efektive për heqje të shpejtë qafe, refuzim daljeje ose pranimi mysafirësh. Duke qenë se jetojmë në një shoqëri ku mysafirët e kanë shprehi me ardhë pa paralajmërim (edhe më së shpeshi në momentet më të këqija), është gati e paverifikueshme, vetëm nëse e merr mundin me i shkue personit në fjalë te dera, ose me i shikue brenda në shtëpi prej dritares.

Shembull efektiv përdorimi:
M'erdh nji kusheri që jeton në Leipzig, as s'e kisha idenë që është këtu për pushime. ose
Mezi e zuna mjeshtrin mbas dy muejsh.
 


2. Jam nisë/duke ardhë
E përdorun ma së shpeshi për vonesa të vogla, posaçërisht nëse të ndodhin të paprituna që nuk i pret, pra, se janë të paprituna, edhe ndodhin pak para se me dalë prej derës së shtëpisë. Këto përfshijnë: mosgjetjen e çelësit të veturës, këmisha/fustani i pahekurosun në sekond të fundit, ndalja e rrymës sa je duke i terë flokët, ndalja e ujit sa je duke i fërkue flokët, e të ngjashme.

Zakonisht, kur komunikohet, kjo përcillet me zhurma të motorrit të veturës në prapavi (që i bën vetë me gojë), për me u dukë se je në rrugë.

Shembull efektiv përdorimi:
Jam te semaforat.
 


1. Kam rast vdjekje'je-je-je
Kjo është bindshëm rrena më efektive dhe univerzale që ekziston, duke i marrë parasysh madhësitë e familjeve shqiptare. Ne jemi popull që i kemi ma shumë se nga 36 gjyshe, të cilat na vdesin nga së paku 9 herë në vjet, e që janë të shpërndame nëpër botë (nji prej gjysheve të mia ka vdekë 4 herë në Guatemala), deri në pikën që është e pamundun me iu verifikue vërtetësia. Poashtu, me këtë rrenë arsyeton periudha kohore prej 2 ditësh deri në një javë të plotë, varësisht sa i afërt me ty është personi që ka "vdekë".

Më e bukura është mënyra se si reagon pranuesi i saj, i cili e merr me keqardhje dhe mirëkuptim, sa që, nëse e përdor mirë, mundesh me i përfitue edhe dy ditë shtesë. Mëso prej krokodillave.

Shembull efektiv përdorimi:
Shumë më ka dashtë. Kemi qenë shumë të afërt. S'e ke idenë sa jam mërzitë.

P.S. Kurrë nuk e kam kuptue thënien "Rrena i ka kambët e shkurtëra." A di kush me ma spjegue?
 
Previous article: Top 10 drekat në Prishtinë
Next article: Copëz e veçantë emocioni

 
[Pieces written in this blog do not necessarily represent Karrota's views and principles, but solely reflect the author's point of view]
 
Recommend this blog article
 
Your thoughts?
Feel free to comment, share your thoughts and ideas, give suggestions, or simply rate this article in the comments below.